WANANCHI WATAKIWA KUPANGA BAJETI

 

Na : Josephine Majula WF, Lindi 

Wananchi wa Halmashauri ya Wilaya ya Ruangwa mkoani Lindi na maeneo mengine ya Tanzania,  wametakiwa kujenga mazoea ya kupanga bajeti ya fedha zao wanapouza mazao au kufanya biashara yoyote ili kuzitumia vizuri fedha  hizo kwa ajili ya shughuli za maendeleo na kujiongezea mitaji.

Rai hiyo imetolewa na Afisa Msimamizi Mkuu wa Fedha, Idara ya Uendelezaji wa Sekta ya Fedha, Wizara ya Fedha, Bw. Salim Khalfan Kimaro, wakati wa semina ya elimu ya fedha kwa wananchi wa makundi mbalimbali  mkoani Lindi ambapo Timu ya wataalamu kutoka Wizara ya Fedha ilifika kutoa elimu hiyo.

“Tunatakiwa kutunza fedha tunazozipata katika shughuli mbalimbali za kiuchumi ikiwemo kilimo, ufugaji, ujasiriamali na biashara badala ya kuzifuja kwa kufanya matumizi yasiyo ya lazima yakiwemo sherehe na ngoma na kujikuta katika lindi la umaskini licha ya kupokea fedha nyingi katika shughuli zetu za kila siku”, alisema Bw. Kimaro.

Aliiongeza kuwa mtu akijiwekea akiba itasaidia kujiepusha na mikopo “kausha damu”  kwa kukopa fedha kwa watu wasio rasmi ambao hutoa fedha kidogo na kuwadai mazao mengi yasiyolingana na fedha walizokopeshwa.

Aidha, aliwasisitiza Wananchi wote nchini kuendelea kutunza fedha zao wanapozipata katika msimu uliopo na kutenga fedha kiasi kwa ajili ya kuhudumia shughuli za uzalishaji msimu unaofuata.

Kwa upande wake mmoja wa wanufaika wa elimu hiyo mkazi wa Ruangwa, Bi. Merryness Mutayabarwa, aliiomba Serikali kuona namna ya kutoa vifaa kama mitaji badala ya fedha taslimu ili viweze kuwasaidia katika shughuli za kiuchumi wanazofanya kama vile mashine za kutotolesha vifaranga, trekta na mifugo.

“Tukipatiwa fedha zinaweza kutumika vibaya tukashindwa kufanya marejesho kwa kuwa fedha ni rahisi mtu akiwa sio mwaminifu kubadili lengo la matumizi ya fedha hizo lakini tukipewa vifaa kama vile trekta, ng’ombe wa maziwa, mashine mbalimbali inakuwa rahisi kuzalisha na kutuwezesha kurudisha mitaji tuliyoazimwa kwa kuwa kunakuwa na uhakika wa kuzalisha”, alisema Bi. Mutayabarwa.

Naye Afisa Maendeleo ya Jamii Wilaya ya Ruangwa, Bw. Mwinyi Jalala, aliwasisitiza Wananchi wa Ruangwa wahakikishe wanapochukua mikopo wanarejesha kwa wakati ili  kutoa fursa na wengine kupata fedha hizo za mikopo.

Wizara ya Fedha inaendelea na zoezi la utoaji elimu kwa wananchi wa makundi mbalimbali mkoani Lindi katika Wilaya sita za Ruangwa, Liwale, Nachingwea, Mtama, Kilwa na Lindi Manispaa ikiwa ni utekelezaji wa maagizo ya Rais wa Jamhuri ya Muungano wa Tanzania, Mhe. Dkt. Samia Suluhu Hassan ya kuhakikisha kila mwananchi anafikiwa na elimu ya huduma ndogo za fedha.