Na: OWM – TAMISEMI, Dar es Salaam
Waziri wa Nchi, Ofisi ya Waziri Mkuu, Tawala za Mikoa na Serikali za Mitaa (OWM–TAMISEMI), Mhe. Prof. Riziki Shemdoe, amesema nchi 22 za Afrika zimekutana nchini katika Mkutano wa Sita wa Jumuiya ya Taasisi za Mitaala Afrika kwa ajili ya kubadilishana uzoefu kuhusu namna mabadiliko ya mitaala inayozingatia umahiri yanavyotekelezwa katika mataifa yao.
Prof. Shemdoe amesema hayo leo, Septemba 22, 2026, jijini Dar es Salaam katika Ukumbi wa Kituo cha Mikutano cha Kimataifa cha Julius Nyerere, mara baada ya kufungua Mkutano wa Sita wa Jumuiya ya Taasisi za Mitaala Afrika kwa niaba ya Makamu wa Rais wa Jamhuri ya Muungano wa Tanzania, Mhe. Deogratius Ndejembi, ambapo Tanzania ni nchi mwenyeji kwa mwaka huu.
“Mataifa haya ya Afrika yatabadilishana uzoefu wa mitaala inayozingatia stadi na umahiri, hivyo mwanafunzi akihitimu anakuwa amepata ujuzi ambao utamwezesha kuutumia katika fani mbalimbali, ikiwa ni pamoja na kuendesha maisha yake,” amesema Prof. Shemdoe.
Prof. Shemdoe amesema katika mkutano huo pia yanashiriki mataifa kutoka nje ya bara la Afrika kwa ajili ya kujionea namna mataifa ya Afrika yanavyotekeleza mitaala inayozingatia umahiri, ikiwemo Tanzania ambayo imeachana na Mtaala wa mwaka 2014 na sasa inatekeleza Mtaala mpya wa mwaka 2023 unaolenga kumpa mwanafunzi wa shule ya msingi na sekondari ujuzi unaohitajika katika maisha na shughuli mbalimbali.
“Sote ni mashahidi kwamba Mhe. Rais Dkt. Samia Suluhu Hassan alitoa fedha nyingi kwa ajili ya ujenzi wa shule 103 za amali ambazo zimejengwa nchi nzima, na shule hizi ndizo zitakazowezesha utekelezaji wa mtaala huu wa mwaka 2023 unaozingatia umahiri. Hivyo, washiriki wa mkutano huu watapata fursa ya kujionea hatua tuliyoipiga katika utekelezaji wa mtaala huo,” Prof. Shemdoe amesisitiza.
Kwa upande wake, Naibu Katibu Mkuu Taaluma, Wizara ya Elimu na Mafunzo ya Amali Zanzibar, Bi. Mwanahamis Adam Ameir, amesema mkutano huo ni muhimu sana katika kipindi hiki ambacho mageuzi mbalimbali yanahitajika katika mifumo ya elimu, hivyo Tanzania itapata fursa ya kubadilishana uzoefu na kupata uelewa wa mambo muhimu ya kuzingatia katika utekelezaji wa Mtaala mpya unaozingatia umahiri.
Naye, Mkurugenzi Mkuu wa Taasisi ya Elimu Tanzania, Dkt. Aneth Komba, amesema mkutano huo wa siku nne unatarajiwa kuzaa Azimio la Dar es Salaam kuhusu Mitaala ya Afrika, Mwongozo wa Uandaaji wa Mitaala Barani Afrika, pamoja na mapendekezo yatakayosaidia kuboresha utekelezaji na uandaaji wa mitaala barani Afrika. Ameongeza kuwa, siku ya mwisho, wageni watapelekwa katika shule mbalimbali ili kujionea namna Serikali ya Awamu ya Sita inavyotekeleza Mtaala mpya wa Elimu wa mwaka 2023.
Kupitia mkutano huo, Tanzania inatarajia kupata maarifa, uzoefu na ubunifu wa kimitaala utakaosaidia kuimarisha mfumo wa elimu unaozalisha wananchi wenye maarifa, ujuzi, ubunifu na maadili, pamoja na uwezo wa kukabiliana na mahitaji ya uchumi wa kisasa. Kwa msingi huo, mkutano huo una umuhimu katika kufanikisha matarajio ya Dira ya Taifa ya Maendeleo 2050 kwa kuimarisha elimu inayojenga rasilimali watu yenye ujuzi, umahiri na uwezo wa kutumia maarifa na ubunifu katika kuchochea maendeleo ya Taifa.
Katibu wa Halmashauri Kuu ya Chama Cha Mapinduzi (CCM) Taifa, Idara ya Mambo ya Siasa na Uhusiano wa Kimataifa (SUKI), Ndg. Rabia Abdalla Hamid (MCC), amesisitiza umuhimu wa kila mwananchi kutimiza wajibu wake katika kudumisha umoja, mshikamano, amani na utulivu nchini.
Ndg. Rabia ameyasema hayo leo Septemba 22, 2026, baada ya kupokelewa katika Ofisi za CCM Mkoa wa Morogoro, ambapo ametembelea vikundi vya wajasiriamali na kusikiliza changamoto zinazowakabili wananchi, huku baadhi ya changamoto hizo zikitatuliwa papo hapo.
Aidha, Ndugu Rabia ametumia nafasi hiyo kuzungumza na makundi mbalimbali ya kijamii, akisisitiza kuwa amani, umoja na mshikamano ni msingi muhimu wa maendeleo ya taifa na ustawi wa wananchi.
Amesema kila mwananchi ndani ya Jamhuri ya Muungano wa Tanzania ana wajibu wa kulinda na kudumisha amani, utulivu, umoja na mshikamano kwa maslahi ya Watanzania wote.
Amesisitiza kuwa wananchi wanapaswa kuendelea kushirikiana na Serikali pamoja na taasisi mbalimbali katika kutatua changamoto zinazowakabili na kujenga jamii yenye mshikamano na mazingira rafiki kwa maendeleo.
.jpeg)
.jpeg)
.jpeg)
.jpeg)
.jpeg)
.jpeg)
Na Munir Shemweta, WANMM KOROGWE
WAZIRI wa Ardhi Nyumba na Maendeleo ya Makazi Mhe. Dkt Leonard Akwilapo amezindua rasmi mpango wa kupanga, kupima na Kumilikisha Ardhi (KKK) katika eneo la Shamba la Mwakinyumbi lililopo Kata ya Hale, Halmashauri ya Wilaya ya Korogwe mkoani Tanga huku akiwataka wananchi wanaoishi eneo hilo kushirikiana na wataalamu ili zoezi hilo likamilike ndani ya muda uliopangwa.
Akizungumza wakati wa uzinduzi wa mpango huo katika uwanja wa Mwenge, Hale Korogwe leo Sept 21, 2026 mkoani Tanga Mhe. Dkt Akwilapo amesema, hatua hiyo inalenga kuwatambua wananchi wanaostahili, kupangiwa na kupimiwa ardhi hiyo, na hatimaye kuwamilikisha viwanja vilivyopimwa kwa mujibu wa taratibu za kisheria.
Mpango wa uendelezaji wa ardhi katika eneo hilo unahusisha ekari 5000 zilizotengwa kwa ajili ya matumizi ya kilimo, makazi na huduma za jamii, miundombinu, ardhi ya akiba, ardhi ya uwekezaji na uchimbaji madini, hifadhi ya mlima na hifadhi ya vyanzo vya maji. Aidha ekari 4,220 zimetengwa kwa vijiji vya Mwanyumbi Station na Miembeni na kufanya jumla ya ekari 9220 kuwa katika mpango huo wa uendelezajI.
Aidha, Dkt Akwilapo aliweka wazi kuwa, kabla ya kuanza kwa zoezi hilo la upangaji na upimaji, wananchi watapatiwa elimu kuhusu taratibu zitakazotumika, vigezo vya utambuzi, ukubwa wa maeneo watakayopangiwa pamoja na masuala mengine ya kisheria na kitaalamu.
" Niwaombe wananchi wa Mwakinyumbi kushiriki kikamilifu katika hatua hiyo ili kupata ufafanuzi na kuelewa namna zoezi litakavyotekelezwa". Amesema
Mbunge wa jimbo la Korogwe Vijijini Mhe. Timotheo Mzava amemuomba Waziri wa Ardhi Nyumba na Maendeleo ya Makazi kuhakikisha wananchi Mwakinyumbi katika kata ya Hale Korogwe wanapewa kipaumbele kwa kuwapatia viwanja kwa gharama nafuu.
Aidha, ametaka pasiwe na utaratibu wa kuwaondoa wanachi walioingia katika shamba la Mwakinyumbi na kufanya maendelezo kwa kuwa tayari wamefanya uwekezaji mkubwa.
" Pasiwe na utaratibu wa kuwaondoa wananchi wa Mwakinyumbi walifanya maendelezo na badala yake warasimishiwe maeneo yao kwa utaratibu ili waendelee kuishi". Amesema Mhe Mzava
Mkuu wa wilaya ya Korogwe kwa upande wake amesema kila mtu ahakikishe anajaza fomu kulingana na maelekezo wasifanye magumashi ili kila mtu apate haki yake.
Eneo la mradi lilikuwa likimilikiwa na Kampuni ya M/S Mwakinyumbi iliyopewa ardhi hiyo mwaka 1989 kwa ajili ya uwekezaji katika kilimo cha mkonge. Hata hivyo, kampuni hiyo ilishindwa kutekeleza masharti ya umilikishwaji, ikiwemo kuliendeleza eneo hilo, hali iliyosababisha milki hiyo kubatilishwa mwaka 2023 na ardhi kurejea serikalini.
Katika hatua nyingine, Waziri wa Ardhi Nyumba na Maendeleo ya Makazi Mhe. Dkt Leonard Akwilapo amewaonya wananchi dhidi ya kuendelea kuuza au kununua ardhi kiholela katika eneo la Shamba la Mwakinyumbi wakati zoezi la upangaji na upimaji likiendelea.
Dkt Akwilapo amewataka wananchi wa eneo hilo kutoendeleza uvamizi wa ardhi au kufanya mauziano yasiyo rasmi, huku akianisha kuwa serikali tayari imeanza kuchukua hatua za kisheria dhidi ya baadhi ya watu wanaodaiwa kuuza ardhi kwa njia za ulaghai.
Na Jackline Minja, WMJJWMM
Mbeya
Zaidi ya Mama Lishe 400 wanatarajiwa kunufaika na Programu ya Mwanamke Shujaa jijini Mbeya, ikiwa ni sehemu ya kuwawezesha wanawake kiuchumi, kukuza biashara na kuhamasisha matumizi ya nishati safi ya kupikia.
Akizungumza katika hafla ya uwezeshaji wanawake kiuchumi kupitia programu hiyo iliyofanyika jijini Mbeya Septemba 21, 2026 Naibu Waziri wa Maendeleo ya Jamii, Jinsia, Wanawake na Makundi Maalum, Mhe. Mhandisi Maryprisca Mahundi, amesema programu hiyo ni mfano wa namna ushirikiano kati ya Serikali, sekta binafsi na jamii unavyoweza kuleta matokeo katika maisha ya wananchi.
Mhe. Mahundi amesema wanawake 160 wenye biashara watapatiwa vitendea kazi pamoja na mafunzo, huku wafanyabiashara 27 wenye mahitaji Maalum watanufaika na mpango huo.
“Ninawasihi sana wanawake wote mtakaopokea vitendea kazi hivi mhakikishe vinatumika kwa madhumuni yaliyokusudiwa yaani kuboresha biashara, kuongeza tija, kuongeza kipato na kuboresha maisha ya familia zenu Msiviangalie vifaa hivi kama msaada wa siku moja. Vione kama mtaji wa safari mpya ya biashara zenu.” amesema Naibu Waziri Mahundi.
Aidha Mhe. Mahundi amesema huu ni mwanzo mzuri wa jitihada kubwa za Serikali kwa kushirikiana na sekta binafsi katika kuimarisha biashara za wanawake, hususan Mama Lishe ambao wana mchango mkubwa katika uchumi wa nchi.
“Tunapozungumzia makundi maalum, tunajumuisha, Mama Lishe, wasusi, waendesha bodaboda na makundi mengine katika shughuli za kiuchumi, Hivyo tunapowapatia vifaa hivi, msisahau kuongeza mitaji na kutumia fursa zilizopo, ikiwemo fursa za mikopo, ili muweze kuendeleza na kukuza biashara zenu na tutahakikisha wanawake hamtoachwa nyuma katika fursa mbalimbali.” amesema Naibu Waziri Mahundi
Kwa upande wake, Mbunge wa Mbeya Mjini, Mhe. Patrick Mwalunenge, amewapongeza kampuni ya Coca-Cola pamoja na kampuni ya Oryx Gas kwa kuwezesha wanawake kupitia Programu ya Mwanamke Shujaa, akieleza kuwa mpango huo umewaletea furaha wanawake walionufaika kwa kuwawezesha wanawake hao kutumia nishati safi ikiwa ni sehemu muhimu ya kuunga mkono jitihada za Serikali katika kutunza mazingira.
Akizungumza kwa niaba ya Mkurugenzi wa Jiji la Mbeya , Mkuu wa Viwanda na Uwezeshaji Mkoa wa Mbeya, Festo Nasho, amesema
kupitia ushirikiano wa kampuni ya Coca-Cola Kwanza na kampuni ya Oryx Gas imejenga na kuimarisha eneo maalum la chakula kwa Mama Lishe katika Soko la Mwanjelwa akiwasihi wanawake wanufaika kutumia fursa hiyo kwa uaminifu, kuendeleza biashara zao na kuweka akiba.
