Recent Post Recent Post
View More

on October 23, 2026

 


Na Mwandishi Wetu.

Wanafunzi wa uandishi wa habari wamehimizwa kutotosheka na elimu ya ngazi ya cheti au stashahada, bali waendelee kujiendeleza hadi kufikia ngazi za juu zaidi ili kujenga uwezo, weledi na ushindani katika taaluma hiyo.

Wito huo umetolewa tarehe 22 Oktoba, 2026, na Afisa Habari Mkuu kutoka Bodi ya Ithibati ya Waandishi wa Habari (JAB), Bw. Prudence Constantine, wakati wa ziara ya maafisa wa Bodi katika Chuo cha Uandishi wa Habari Dar es Salaam (Dar es Salaam School of Journalism-DSJ).

Ziara hiyo imelenga kujifunza kuhusu mazingira na mifumo ya utoaji wa mafunzo ya uandishi wa habari, kuimarisha ushirikiano kati ya JAB na chuo hicho, pamoja na kuhakikisha mafunzo yanayotolewa yanawaandaa wanafunzi kukidhi viwango vya elimu, ithibati, maadili na weledi vinavyohitajika katika taaluma ya uandishi wa habari.
Akizungumza na wanafunzi wanaosoma ngazi ya cheti, Constantine amesema taaluma ya uandishi wa habari inahitaji watu wenye elimu, ujuzi na maarifa mapana ili waweze kukabiliana na mabadiliko na changamoto zinazojitokeza katika utekelezaji wa majukumu yao.

Amewataka wanafunzi hao kujikita katika masomo, kujenga utamaduni wa kujifunza na kuendelea kupanua maarifa yao, akieleza kuwa maendeleo ya teknolojia na mabadiliko katika tasnia ya habari yanahitaji Waandishi wa Habari wenye uwezo wa kuendana na wakati.

Katika mazungumzo hayo, maafisa wa JAB walikutana na wanafunzi na wakufunzi wa DSJ na kujadiliana kuhusu mafunzo, viwango vya taaluma na umuhimu wa kuimarisha mazingira ya ujifunzaji na kuwaandaa wanafunzi kutekeleza majukumu ya kihabari kwa kuzingatia weledi na maadili.
Kwa upande wao, wakufunzi wa DSJ wameiomba JAB kuendelea kutekeleza majukumu yake ya kusimamia na kuimarisha taaluma ya uandishi wa habari, ili kuhakikisha Waandishi wa Habari wanazingatia maadili, weledi na misingi ya taaluma hiyo.

Ziara hiyo ni sehemu ya juhudi za JAB za kuimarisha ushirikiano na vyuo vinavyotoa mafunzo ya uandishi wa habari, kwa lengo la kuboresha maandalizi ya wataalamu na kuinua viwango vya taaluma nchini.
soma zaidi »

on October 22, 2026

 


📌Asema mikutano ya kitaaluma  inachochea mageuzi ya kiuchumi  na ubunifu;


Naibu Waziri wa Viwanda na Biashara, Mhe. Dennis Londo (Mb),  amekitaka Chuo cha Elimu ya Biashara (CBE) kuhakikisha wanatumia tafiti kuchochea mageuzi ya kiuchumi  kuelekea  Dira 2050.

Amesema hayo wakati wa Ufunguzi wa Mkutano wa Saba wa Kitaaluma wa Kimataifa wa Mwaka 2026 ulioandaliwa na Chuo cha CBE uliofanyika Mwanza.

Londo amesema mkutano huo unachochea mageuzi ya mifumo ya kibiashara, ubunifu, urasimishaji na matumizi ya takwimu kuelekea ukuaji endelevu wa uchumi ambapo inaunga mkono juhudi za Serikali ya Awamu ya Sita za kutekeleza Dira ya Taifa ya 2050 kwa vitendo.

Mhe. Londo pia ametoa rai kwa Taasisi za Serikali na Sekta Binafsi kuanza kutumia kikamilifu matokeo ya tafiti kutoka vyuo vya elimu ya juu ili kuleta tija na matokeo chanya kwa maendeleo ya Taifa.

Aidha amekitaka Chuo hicho kuandaa changanuzi za kisera (policy briefs) zitakazosaidia maboresho ya sera na mipango ya kiuchumi na kuweka mikakati ya kurudisha mrejesho kwa jamii kwa kuwasilisha matokeo ya tafiti kwa lugha rahisi, kuendesha mafunzo maalumu kwa wajasiriamali na wafanyabiashara, na kutoa rai kwa vyuo vingine kuiga mfano wa CBE katika kuandaa mikutano ya kitaaluma.

Vilevile amekitaka Chuo hicho kuendelea kuboresha kozi zake za muda mfupi na mrefu ili kuzalisha wataalamu wa kutosha watakaofundisha somo hilo mashuleni na kuimarisha elimu ya biashara nchini kwa kuwa Sera ya Elimu na Mafunzo ya Mwaka 2023 imefanya somo la Biashara kuwa la lazima kwa wanafunzi wa Kidato cha Kwanza hadi cha Nne kuanzia mwaka wa masomo 2025/2026.

soma zaidi »

on October 22, 2026

Na, Mwandishi Wetu – Dar es Salaam

Serikali inaendelea kuweka mkazo maalum kwenye kuboresha mfumo wa uratibu na upatikanaji wa mafunzo ya utarajali (internship) kwa kuwapatia wahitimu wa kada mbalimbali, uzoefu na ujuzi unaohitajika kwa lengo la kuwafanya wahitimu hao kuwa shindani katika soko la ajira la ndani na nje ya nchi.

Akiongoza kikao cha Makatibu Wakuu kilichofanyika Ofisi ndogo ya Waziri Mkuu jijini Dar es Salaam Oktoba 22, 2026, Katibu Mkuu, Ofisi ya Waziri Mkuu, Sera, Bunge, Uratibu na Wenye Ulemavu, Dkt. Jim Yonazi, amesema maboresho yanayoendelea kufanyika ni sehemu ya utekelezaji wa maelekezo ya Makamu wa Rais wa Jamhuri ya Muungano wa Tanzania, Mhe. Deogratius Ndejembi, aliyoyatoa wakati akimwakilisha Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwenye kikao kazi cha wenyeviti wa bodi na watendaji wakuu wa taasisi na mashirika ya umma (C-COEs Forum 2026) tarehe 28 Septemba, 2026 jijini Arusha.

Katika kikao kazi cha wenyeviti wa bodi na watendaji wakuu wa taasisi na mashirika ya umma, Mhe. Makamu wa Rais alielekeza kuandaliwa kwa mpango wa mafunzo kwa vitendo utakaowawezesha angalau vijana 10,000 kupata uzoefu katika mashirika ya umma na wengine 20,000 kwenye sekta binafsi, ikiwa ni sehemu ya utekelezaji wa Dira ya Taifa ya Maendeleo 2050, hususani nguzo ya pili inayosisitiza maendeleo ya watu na rasilimali watu nchini.

Katika kikao hicho cha Makatibu Wakuu, Dkt. Yonazi amesema kuwa Serikali inaendelea kuweka kipaumbele kikubwa kwenye masuala ya mafunzo kwa vitendo (internship) kwa wahitimu ili kuziba pengo la kutokuwa na uzoefu, na kuwapa wahitimu hao uwezo wa kuunganisha elimu ya darasani na uhalisia wa mazingira ya kazi pamoja na kuongeza ushindani kwenye soko la ajira.

“Mafunzo ya ujuzi na uzoefu wa kazi yanapatikana kupitia taasisi mbalimbali za Serikali, vyuo vya ufundi, na programu za kitaifa zinazolenga kuwaandaa vijana kuwa shindani katika soko la ajira”, ameeleza Dkt. Yonazi.


Kikao hicho kiliwashirikisha Makatibu Wakuu wa kisekta kutoka Ofisi ya Rais, Menejimenti ya Utumishi na Utawala Bora, Ofisi ya Rais Mipango na Uwekezaji, Ofisi ya Rais Maendeleo ya Vijana, Ofisi ya Waziri Mkuu-Tawala za Mikoa na Serikali za Mitaa, Ofisi ya Waziri Mkuu - Kazi, Ajira na Mahusiano, Wizara ya Fedha, Wizara ya Kilimo, Wizara ya Elimu, Sayansi na Teknolojia pamoja na Wizara ya Ujenzi.

soma zaidi »

on October 22, 2026
Meneja wa Wakala wa Barabara Tanzania (TANROADS)Mkoa Mbeya Mhandisi Suleiman Bishanga akifafanua jambo kuhusu utekelezaji wa maelekezo ya Makamu wa Rais Dk.Deogratius Ndejembi kuhusu ujenzi wa barabara jijini Mbeya.
soma zaidi »

on October 22, 2026

 


Na Oscar Assenga,TANGA

TANZANIA inaweza kupunguza kasi ya uharibifu wa misitu kwa kutumia mabaki ya zao la mkonge kutengeneza bidhaa zinazofanana na mbao, hatua inayotarajiwa kupunguza utegemezi wa mbao zinazotokana na ukataji wa miti na kufungua fursa mpya za uwekezaji katika sekta ya kilimo.

Utafiti uliofanywa na watafiti kutoka Tanzania na taasisi washirika umebaini uwezekano wa kutumia mabaki ya mkonge kutengeneza bidhaa mbalimbali zenye thamani, zikiwamo mbao mbadala, mbolea, chakula cha mifugo na gesi.

Hatua hiyo inalenga kuongeza thamani ya zao hilo kwa kutumia sehemu kubwa ya malighafi ambayo kwa sasa hutupwa kama taka, badala ya kuachwa bila manufaa ya kiuchumi.

Mkurugenzi Mkuu wa Bodi ya Mkonge Tanzania (TSB), Saddy Kambona, alisema takribani asilimia mbili tu ya zao la mkonge ndizo zinazotumika kuzalisha nyuzi, huku asilimia 98 iliyobaki kwa kiasi kikubwa ikipotea kama taka.

Akizungumza  wakati wa uwasilishaji wa matokeo ya utafiti huo, Kambona alisema teknolojia zilizobuniwa zinaweza kusaidia kupanua matumizi ya mkonge, kuongeza mapato na kuimarisha uhifadhi wa mazingira.

“Takribani asilimia 98 ya zao hili kwa sasa hutupwa kama taka, lakini utafiti umeonyesha uwezekano wa kupanua matumizi ya mkonge kwa kuzalisha mbao, gesi na bidhaa nyingine,” alisema.

Alisema matumizi mapya ya mabaki ya mkonge yanaweza kuongeza thamani ya zao hilo na kuwapa wadau wa sekta hiyo fursa zaidi za kibiashara, huku yakichangia kupunguza taka zinazotokana na shughuli za kilimo na viwanda.

Utafiti huo unafanyika kupitia mradi wa AgroVal, unaolenga kuongeza thamani ya mabaki ya kilimo na viwanda vya mazao kwa kuyaunganisha na uzalishaji wa chakula, bidhaa za kibaiolojia na nishati ya kibaiolojia.

Mradi huo unahusisha Taasisi ya Sayansi na Teknolojia ya Afrika ya Nelson Mandela (NM-AIST) nchini Tanzania, Chuo Kikuu cha Ufundi cha Denmark, Chuo Kikuu cha Pwani nchini Kenya na taasisi nyingine washirika.

Mtafiti wa NM-AIST, Dk. Clemence Ansbert, alisema bidhaa inayofanana na mbao inayotengenezwa kutokana na mabaki ya mkonge inaweza kuwa mbadala wa mbao za kawaida na kusaidia kupunguza utegemezi wa malighafi inayopatikana kwa kukata miti.

Alisema ubunifu huo unaweza kuchangia juhudi za kujenga Tanzania ya kijani kwa kuhimiza matumizi bora ya rasilimali zilizopo na kupunguza shinikizo kwa misitu.

Hata hivyo, mafanikio ya bidhaa hiyo katika kupunguza ukataji miti yatategemea gharama za uzalishaji, mahitaji ya soko na uwezo wake wa kuchukua nafasi ya mbao zinazotumika kwa sasa.

Kambona alisema TSB inaendelea kushirikiana na taasisi mbalimbali za utafiti, zikiwamo Taasisi ya Utafiti wa Kilimo Tanzania (TARI), NM-AIST, Chuo Kikuu cha Dar es Salaam na Chuo Kikuu cha Dodoma, kutafuta njia za kibiashara za kutumia mabaki ya mazao ya kilimo.

Alisema uwasilishaji wa matokeo ya utafiti huo ni hatua ya awali ya kuyafikisha kwa wadau wengi zaidi, huku hatua zinazofuata zikitarajiwa kujumuisha majadiliano na wadau, hasa wawekezaji wanaoweza kusaidia kuendeleza teknolojia hizo.

Kiongozi wa utafiti huo, Profesa Anthony Mshandete, alisema mradi unalenga kubadilisha taka za kilimo na viwanda vya mazao kuwa bidhaa zenye thamani na nishati safi, ili kuongeza ufanisi katika matumizi ya rasilimali za asili.

Alisema utafiti huo pia unachunguza namna ya kuzalisha mbolea kwa kutumia lava za mdudu aina ya black soldier fly, ambazo zina uwezo wa kuchakata mabaki ya mkonge na kuyabadilisha kuwa malighafi yenye manufaa kwa kilimo.

Dk. Aziza Konyo alisema timu ya watafiti imebaini uwezekano wa kutumia mchakato huo, ambapo wadudu hao hubadilisha taka za kikaboni kuwa biomasi na mabaki yenye virutubisho vinavyoweza kutumika katika shughuli za kilimo.

Iwapo teknolojia hizo zitafikia hatua ya kuzalishwa kibiashara, zinaweza kuongeza mapato kwa wadau wa mkonge, kupunguza upotevu wa rasilimali na kufungua fursa mpya za uwekezaji katika uzalishaji wa bidhaa mbadala na nishati safi.
soma zaidi »

on October 22, 2026
Mgeni rasmi wa Mkutano wa 26 wa Baraza la Wahitimu wa Chuo Kikuu Mzumbe, Prof. Elisante Ole Gabriel (katikati), akimpongeza Mhitimu Bora wa Mwaka 2025/2026, Bw. Colins Mulema (kushoto), wakati wa mkutano huo uliofanyika katika Chuo Kikuu Mzumbe.
soma zaidi »

on October 21, 2026
Mkuu wa Wilaya ya Nyamagana mkoani Mwanza, Mhe. Jubilate Lauwo, amefungua rasmi Kliniki ya Viwango (Viwango Clinic), iliyoandaliwa na Shirika la Viwango Tanzania (TBS) kwa lengo la kusogeza huduma karibu na wananchi.
soma zaidi »

on October 21, 2026

NA EMMANUEL MBATILO, DAR ES SALAAM

Kupata cheti cha kimataifa cha ubora cha ISO 9001:2015 kumeiwezesha Bodi ya Mikopo ya Wanafunzi wa Elimu ya Juu (HESLB) kuweka mkakati wa kutumia teknolojia kupunguza muda wa kutuma fedha za mikopo kwa wanafunzi wanaostahili kutoka siku moja au mbili hadi sekunde mbili.

soma zaidi »

on October 21, 2026
Shirika la Viwango Tanzania (TBS) limesogeza huduma karibu na wananchi jijini Mwanza kupitia kambi maalum ya Viwango Clinic, ili kufikisha elimu kuhusu ubora wa bidhaa mbalimbali za chakula na vipodozi.
soma zaidi »

on October 20, 2026
Baraza la Taifa la Hifadhi na Usimamizi wa Mazingira (NEMC) limekutana na Kiongozi wa Tanzania National Business Council (TNBC) pamoja na Rais wa Tanzania Private Sector Foundation (TPSF) kujadili namna ya kutatua changamoto za masuala ya mchakato wa tathmini ya Athari kwa Mazingira na Jamii (EIA) na upatikanaji wa vyeti.
soma zaidi »

on October 20, 2026

Kamishna wa Elimu Dkt. Lyabwene Mtahabwa, amesisitiza umuhimu wa kuwafundisha watoto kutambua na kuelewa mazingira yanayowazunguka kabla na sambamba na kujifunza kusoma na kuandika, akisema hatua hiyo ni msingi muhimu wa kuwajengea uwezo wa kuelewa maarifa wanayoyapata kupitia vitabu.

Akizungumza Oktoba 20, 2026, katika viwanja vya Bodi ya Huduma za Maktaba Tanzania, Posta, jijini Dar es Salaam, Dkt. Mtahabwa alisema hayo alipomwakilisha Katibu Mkuu wa Wizara ya Elimu, Sayansi na Teknolojia, Prof. Carolyne Nombo, katika ufunguzi wa Kongamano la Nne la Kitaifa la Huduma za Maktaba na Tamasha la Vitabu na Usomaji.

Alisema katika kukuza utamaduni wa kusoma, ni muhimu kuanza kwa kumsaidia mtoto kuelewa ulimwengu unaomzunguka, ikiwemo watu, vitu, shughuli na tamaduni, kabla na wakati anapojifunza kusoma na kuandika.

“Tunaposema vitabu na usomaji, ni vizuri tuanze na jambo moja muhimu sana katika maisha ya mwanadamu; kusoma ulimwengu kisha kusoma neno,” alisema Dkt. Mtahabwa.

Akifafanua zaidi, alirejelea dhana ya mwanafalsafa wa Brazil, Paulo Freire, kuhusu kusoma ulimwengu na kusoma neno, akisema mtoto anapopata uelewa wa mazingira yake, hujengewa msingi mzuri wa kuelewa na kutafsiri maarifa anayoyapata kupitia maandishi.

Alisema mazingira ya elimu ya awali yanapaswa kuandaliwa ili kuwawezesha watoto kujifunza kwa vitendo kupitia vitu halisi, watu na mazingira yanayowazunguka, sambamba na kuhamasishwa kusoma vitabu vya nakala ngumu na nakala laini.

“Tuwa­fundishe watoto kusoma vitabu sana, na tuanze kwa kuwafundisha kusoma ulimwengu,” alisema Dkt. Mtahabwa, akisisitiza kuwa kuwawezesha watoto kuelewa mazingira yao na kusoma vitabu kutawasaidia kupata maarifa, kukuza uwezo wa kufikiri na kukabiliana na changamoto za maisha kwa ufanisi.

soma zaidi »

on October 20, 2026

 ▪️Atoa wito kwa nchi za Afrika kuimarisha ushirikiano wa kikanda, kuongeza thamani ya madini na kuharakisha utekelezaji wa Dira ya Madini ya Afrika.



📍Accra, Ghana

Waziri wa Madini, Mhe. Anthony Peter Mavunde, amezitaka nchi za Afrika kuacha kufanya kazi kwa kujitenga na badala yake kuunganisha nguvu katika usimamizi na uendelezaji wa rasilimali za madini ili kukuza viwanda, ajira na uchumi wa bara hilo.

Ameyasema hayo leo Oktoba 19 wakati akizungumza katika mjadala wa jopo la Mawaziri kutoka nchi za Tanzania, Nigeria na Liberia uliokuwa na mada isemayo “From Vision to Delivery: Making the African Mining Vision Work for Member States”,katika mkutano wa Kimataifa wa Mining in Motion unaofanyika kwasiku tatu kuanzia Oktoba 19 hadi 21, 2026 jijini Accra Ghana.

Mhe. Mavunde amesema wakati umefika kwa nchi za Afrika kuweka pembeni tofauti zao na kushirikiana kutekeleza mikakati ya pamoja ya maendeleo ya Sekta ya Madini.

Amesema Afrika ina zaidi ya asilimia 32 ya rasilimali za madini muhimu zinazojulikana duniani, lakini bado sehemu kubwa ya utajiri huo husafirishwa nje ya bara bila kuongezwa thamani ya kutosha na kuwa hali hiyo inanyima nchi za Afrika fursa za kujenga viwanda, kutengeneza ajira na kuongeza mapato.

Akifafanua hatua zinazochukuliwa na Tanzania, Mhe. Mavunde amesema mageuzi ya kisheria yaliyofanyika mwaka 2017 yameimarisha usimamizi wa rasilimali za madini na ushiriki wa Serikali, huku hatua za kuzuia usafirishaji wa madini ghafi zikichochea uongezaji thamani nchini.

Ameeleza kuwa Tanzania sasa chini ya uongozi wa Rais Mhe. Dkt. Samia Suluhu Hassan ina zaidi ya viwanda vinane vya kusafisha dhahabu na viwanda zaidi ya 16 vya uchakataji na usafishaji wa madini ya metali za msingi na kuwa Sekta ya Madini inachangia asilimia 10.3 ya Pato la Taifa, huku wachimbaji wadogo wakichangia takribani asilimia 40 ya uzalishaji wa sekta hiyo ikiwa ni matokeo ya hatua za dhati za Serikali kuimarisha sekta hiyo.

Katika kuimarisha ushirikiano wa kikanda, Mhe. Mavunde amezitaja Tanzania, Madagascar na Msumbiji kuwa na fursa ya kuunganisha nguvu katika uendelezaji wa rasilimali za grafiti, uchakataji na uoanisha wa sera ili kujenga mnyororo wa thamani unaowanufaisha wananchi wa nchi hizo.

Amesisitiza kuwa Dira ya Madini ya Afrika haipaswi kubaki kwenye nyaraka na majadiliano, bali inapaswa kuambatana na utekelezaji wa vitendo huku akihimiza nchi wanachama kuimarisha mifumo ya mazungumzo na maamuzi ya pamoja ili kuharakisha utekelezaji wa mikakati iliyokubaliwa.

“Ni wakati sasa kwa Afrika kuanza kufanya kazi pamoja. Afrika ni moja, na tunapaswa kufanya kazi kama timu moja,” amesisitiza Mhe. Mavunde, akieleza kuwa ushirikiano ni muhimu katika kuhakikisha rasilimali za madini zinachochea maendeleo ya viwanda na ukuaji wa uchumi.

Waziri Mavunde ametoa wito kwa nchi za Afrika kugeuza utajiri wa madini kuwa fursa za viwanda, ajira, teknolojia na mapato zaidi, badala ya kuendelea kuuza madini ghafi na kununua bidhaa zilizoongezwa thamani kutoka nje ya bara hilo.

Awali akifungua rasmi Mkutano huo, Rais wa Jamhuri ya Ghana Mheshimiwa John Dramani Mahama amesema kuwa ni muda wa Afrika kugeukia soko la madini muhimu na mkakati kutokana na uhitaji mkubwa wa nishati safi ulimwenguni, lengo ni kuyaongezea thamani madini haya kabla hayajaenda katika soko la dunia.








soma zaidi »

on October 20, 2026
NA EMMANUEL MBATILO, DAR ES SALAAM

Uimarishaji wa viwango vya ubora wa nafaka na mazao ya jamii ya kunde unatajwa kuwa hatua muhimu ya kuongeza ushindani wa bidhaa za Tanzania katika masoko ya kimataifa, huku wadau kutoka nchi 70 duniani wakikutana nchini kujadili namna ya kuboresha viwango hivyo.
soma zaidi »

on October 20, 2026
Waziri wa Elimu, Sayansi na Teknolojia, Prof. Adolf Mkenda, amesisitiza umuhimu wa Tanzania kuendelea kuandika na kuhifadhi historia, utamaduni na maarifa yake ili vizazi vijavyo viweze kujifunza kuhusu nchi yao kutoka katika vyanzo vilivyoandikwa na Watanzania wenyewe.
Prof. Mkenda amesema hayo Oktoba 20, 2026, jijini Dar es Salaam wakati akifungua Kongamano la Nne la Kitaifa la Huduma za Maktaba na Tamasha la Vitabu na Usomaji, akisisitiza kuwa taifa lisipoandika hadithi yake lenyewe, kuna hatari ya historia na maarifa kuhusu Tanzania kutawaliwa na taarifa kutoka nje ya nchi.
Amesema Serikali itaendelea kusimama na waandishi wa Tanzania na kuunga mkono sekta ya uchapishaji katika kuhakikisha vitabu vinavyoandikwa  vinapata soko ikiwemo kuchapishwa na kusambazwa katika shule, maktaba na maeneo ya jamii.
Prof. Mkenda ameitaka Bodi ya Huduma za Maktaba Tanzania kuongeza ununuzi wa vitabu vya Watanzania na kuvisambaza katika maktaba mbalimbali, akisisitiza kuwa hatua hiyo itasaidia kuongeza ari na kuhamasisha uandishi nchini.
Aidha, amezitaka halmashauri na taasisi mbalimbali kutenga maeneo kwa ajili ya kuanzisha maktaba za jamii, ili wananchi, hususan watoto na vijana, wapate maeneo ya kusoma na kupata maarifa. 
Amesema maeneo hayo yanaweza kuwa katika shule, taasisi za dini na maeneo mengine yanayofikika kwa urahisi jamii.
Akizungumzia Tuzo ya Taifa ya Mwalimu Nyerere ya Waandishi Bunifu, Prof. Mkenda amesema tuzo hiyo ni sehemu ya juhudi za Serikali za kuchangamsha usomaji, kukuza uandishi na kuendeleza Kiswahili, huku akiwahimiza waandishi kutumia fursa hiyo kuwasilisha kazi zao na kushiriki katika kukuza sekta ya vitabu nchini.
Amesema Kongamano hilo linapaswa kuwa chachu ya kuendelea kukuza uandishi, usomaji na uhifadhi wa maandishi, akisisitiza kuwa Tanzania inapaswa kujiamini na kuhakikisha historia na hadithi zake zinaandikwa na kuhifadhiwa na Watanzania wenyewe kwa manufaa ya kizazi cha sasa na kijacho.
Ufunguzi wa Kongamano la Nne la Kitaifa la Huduma za Maktaba na Tamasha la Vitabu na Usomaji umeenda sambamba na uzinduzi wa Mfumo Jumuishi wa Maktabawa Taifa kwa ajili ya kutambua na kuhifadhi machapisho yanayozalishwa nchini katika kumbukumbu za Taifa .
      
soma zaidi »

on October 20, 2026



Naibu Waziri wa Nishati, Mhe. Salome Makamba, amewasilisha maboresho ya Kanuni za Sheria Ndogo za Min - LNG mbele ya Kamati ya Kudumu ya Bunge ya Sheria Ndogo inayoongozwa na Mwenyekiti wake, Mhe. Cecilia Pareso.

Kikao hicho kimefanyika leo, Oktoba 20, 2026 katika Ofisi Ndogo za Bunge jijini Dodoma, kikiwa na ushiriki wa wajumbe wa Kamati hiyo, Mkurugenzi Mtendaji wa EWURA, Ndg. Salum Mnuna, wawakilishi wa Taasisi za Mafuta na Gesi chini ya Wizara ya Nishati pamoja na wataalam wa sekta husika.













soma zaidi »
Subscribe to: Posts (Atom)